Kryeministri Edi Rama ka zhvilluar një bashkëbisedim virtual me ndjekësit në rubrikën Sy m’Sy, ku është pyetur se kur do të bëjë debat publik me opozitën.
Por, kreu i qeverisë ka lënë të nënkuptohet se s’do të ketë një debat publik me kreun e PD-së, Sali Berishën, i cili i ka bërë festë hapur.
“Me kë opozitë duhet të një debat publik? Unë debatin publik kam vite që e bëj, përditë. Për çfarë debate publik e ke fjalën? Për cilën opozitë? Nuk e kuptoj”, u shpreh Rama.
Po ashtu Rama përmendi një sulm që ka marrë në faqen e tij të FB nga një subjekt i ri politik pas publikimit të një video satirike që shënjestronte opozitën.
“Nuk shaj, këto janë forma barbare komunikimi. Më pëlqen të përdor satirën. Para disa ditësh, është postuar në këtë faqe një episod i një krijimi të dy të rinjve që ma kanë dërguar me dëshirë që ta postoj, një teatër kukullash sipas meje i lezetshëm për të dhënë një mesazh kuptimplotë dhe është sulmuar faqja nga një tufë e madhe kandidatësh të një subjekti politik të rinjtë. Por e vetmja gjë që mund të kuptoj nga ai sulm i organizuar të deputetëve të subjektit të ri politik është vjetërsia e mendjes së tyre. Kush nuk është në gjendje të përballojë as humorin dhe satirën nuk duhet të merret me politikë. Mua më ka ardhur çudi nga njerëzit që shqetësoheshin pse bëj humor me ta. Kështu që humori është mënyrë komunikimi serioz për hir të së vërtetës”, tha Rama.