Problemet që lidhen me procesin e tretjes, si kapsllëku ose vështirësia në gëlltitje, mund të dyfishojnë shanset për të zhvilluar sëmundjen e Parkinsonit, sipas një studimi të ri.
Shfaqja e sëmundjes së Alzheimerit dhe rreziku i sulmit në zemër apo aneurizmës së trurit kanë qenë prej kohësh të lidhura me sistemin tretës dhe gastrointestinal. Megjithatë, përkundër ekzistencës së indikacioneve që Parkinson-i dhe stomaku mund të jenë të lidhura, studimet që lidhen me sëmundjen me çrregullime specifike të tretjes janë të pakta.
Studimi i ri tregon se katër sëmundje specifike janë një paralajmërim për ardhjen e mundshme të sëmundjes. “Ky është studimi i parë që krijon prova thelbësore” se një diagnozë klinike e sëmundjeve që lidhen me tretjen “mund të jetë një parashikues i rëndësishëm i një sëmundjeje të ardhshme të Parkinsonit”, përfundojnë autorët.
Studiuesit krahasuan të dhënat mjekësore të 24,624 njerëzve me Parkinson dhe 19,046 me Alzheimer. Historia e tyre deri në gjashtë vjet para fillimit të secilës gjendje u studiua më pas për të parë shpeshtësinë e çrregullimeve të tretjes gjatë kësaj periudhe
Të dy krahasimet treguan se pacientët me probleme të tretjes kanë një rrezik më të lartë për t’u diagnostikuar me Parkinson. Ata me kapsllëk, disfagi (vështirësi në gëlltitje), gastroparezë (paralizë stomaku) dhe sindromë të zorrës së irrituar kishin më shumë se dy herë më shumë gjasa të zhvillonin sëmundjen brenda pesë viteve nga diagnoza.
Disa komplikime të tjera si dispepsi dhe diarre u gjetën gjithashtu të zakonshme në mesin e njerëzve që pritet të zhvillojnë Parkinson. Por ato janë gjithashtu të zakonshme tek njerëzit që zhvillojnë Alzheimer, sulme në zemër dhe aneurizma. Përveç kësaj, pacientët që kishin hequr më parë apendiksin e tyre duket se ishin kandidatë më pak të mundshëm për të zhvilluar Parkinson.
Duke komentuar mbi gjetjet, Claire Bale, zëvendëskrye studiuese në Parkinson’s MB, tha se ato “shtojnë më shumë peshë” në numrin në rritje të provave që problemet e tretjes janë shenja të hershme paralajmëruese të Parkinsonit. Kim Barrett, një studiuese në Universitetin e Kalifornisë, San Francisko, tha se mund të jetë e rëndësishme që mjekët të “vënë re” këto probleme të tretjes kur përpiqen të vlerësojnë mundësinë e Parkinsonit te një pacient, “madje shumë kohë përpara se të shfaqen simptomat aktuale neurologjike”. Megjithatë, ai këshilloi të bëni kujdes.
“Gjetjet lidhen absolutisht me çrregullimet në procesin e tretjes me fillimin e sëmundjes së Parkinsonit. Por është shumë e mundur që të dyja këto çrregullime dhe Parkinson të lidhen edhe me një faktor të tretë, ende të panjohur për ne”, tha ai.