Ish kryenegociatori i Shqipërisë për në BE, Zef Mazi, e konsideron një propagandë elektorale dhe politike të kryeministrit Edi Rama, premtimin e këtij të fundit që Shqipëria do të integrohet në BE brenda 2030. I ftuar në emisionin “Çim Peka Live” në Syri Tv, Mazi tha se janë 34 grup-kapituj që duhen hapur, nga të cilat vendi ynë ka nisur punën, në vetëm 16 kapituj, dhe që ende nuk janë mbyllur.
“Duhen negociuar të gjithë grup kapitujt, kombinimi mes politikës, diplomatikë, diplomatët e karrierës dhe elementët teknike. Në negociata s’ka asgjë elemente teknike, por politike. Janë interesa politiko-ekonomike brenda. Negociatat teknike me unionin nuk ka. Shqipëria duhet të hapë 34 kapituj. Janë hapur 16 kapituj por s’janë mbyllur asnjë.
S’kemi mbyllur asnjë kapitull. Për mua është shumë e vështirë në 2 vite, vetëm nëse unioni mund të kapërcejë disa standarde. Por ka një kalendar unioni. Kur bashkohet korpusi ligjor me tonin, është njëra gjë. Duhet të nisë zbatimi, a i kemi ne mekanizmat? Duhet të shkojnë paralele. Sa më herët të bëhen këto punë, aq më shpejt do të shkonte ky proces. Në këtë proces s’duhet të jesh neglizhent selektiv, ndryshe do të kesh probleme.
Unioni është i lidhur me shtetin. Kur Shqipëria negocionte me NATO, ishte PD në pushtet. Kur u ulën në tavolinën e NATO-s, s’ishte shkruar PD e Shqipërisë, njëjtë do ndodhë dhe me procesin, s’do të shkruhet PS. Nëse nuk shkon paralele, pavarësisht rotacioneve politike do të vuajmë më shumë. E rëndësishme është që Shqipëria është në këtë rrugë, por jemi në fushatë zgjedhjesh dhe thuhen gjëra për efekt propagande dhe politike”, – u shpreh Mazi.
I pyetur se përse u tërhoq nga posti i kryenegociatorit, Mazi la të kuptohej për një ‘përplasje’ mes tij dhe Ramës, mbi mënyrën e konceptimit të procesit integrues të Shqipërisë në BE.
“Reformat e unionit dhe integrimi i vendeve tona, duhet të ndahen. Sepse do të vijë dita që njëri do pengojë tjetrën. Nëse s’ndahen, shoh që në rreshta duhet lexuar një tendencë për ta shtyrë këtë proces. Më 2027 për të qenë gati na ndajnë 2 vjet, dy vite reale janë, është një rrugë e madhe, çdo gjë është e mundur.
Të kishte një dikaster të plotë me të paktën 100 vetë për këtë proces. Rotacionet politike s’e pengojnë, në cilindo shtet qoftë, tregon se ke një demokraci normale. Ekipet që merren me këtë nuk është e mirë që të ndërrohen. Rotacionet i shërbejnë ecurisë dhe demokracisë së një shteti.
Di që ka një kryenegociatore por s’di se ç’ka bërë, por në funksionin që ka s’di ç’të them. Është një proces i gjatë dhe kërkon impenjim të madh politik, diplomatik dhe familjar. Kur u hapën negociatat, ishte e qartë që perceptimi im për këtë punë dhe i kryeministrit Rama, s’ishin paralele dhe nuk puqeshin. Ishte momenti të largohesha dhe kisha mbushur e moshën për në pension” – tha Mazi.