Presidenti i Serbisë Aleksandër Vuçiç tha të mërkurën se ai nuk e ka ndryshuar mendjen për pjesëmarrjen në paradën e “Ditës së fitores” në Moskë muajin e ardhshëm, pavarësisht presionit të madh nga Bashkimi Evropian për vendimin e tij. Zyrtarët evropianë e kanë paralajmëruar Vuçiç se vizita e tij në Moskë për përvjetorin e fundit të Luftës së Dytë Botërore do të ishte një shkelje e kritereve të anëtarësimit të bllokut për anëtarët e rinj të mundshëm dhe mund të prishë ambiciet e Beogradit për në BE.
Vizita do të përbënte gjithashtu një shfaqje të mbështetjes për luftën e Putinit dhe të Moskës kundër Ukrainës. Vuçiç, i cili shpesh ka shprehur pikëpamje pro-ruse, ka thënë se një nga njësitë ushtarake të Serbisë do të marrë pjesë në paradën e 9 majit në “Sheshin e Kuq” në kryeqytetin rus. Ai tha gjithashtu se Serbia për herë të parë po merr pjesë në organizimin e paradës.
“Në periudhën që vjen, ne do të jemi nën presion në lidhje me aktivitetin në Moskë në të cilin kemi paralajmëruar pjesëmarrjen tonë”, – u tha Vuçiq gazetarëve. Në fillim të kësaj jave, shefja e politikës së jashtme të BE-së Kaja Kallas tha se blloku “e bëri shumë të qartë se nuk dëshiron që asnjë vend kandidat të marrë pjesë në këto aktivitete të 9 majit në Moskë”.
Megjithëse pretendon se dëshiron ta çojë Serbinë në BE, Vuçiç ka mbajtur marrëdhënie të ngushta me Rusinë dhe ka refuzuar të vendosë sanksione perëndimore kundër Moskës, politika që pothuajse kanë bllokuar plotësisht bisedimet e pranimit të vendit ballkanik me bllokun 27-vendesh.
Vuçiç ka thënë se do të udhëtojë në Moskë me aleatin e tij të krahut të djathtë, kryeministrin e Sllovakisë Robert Fico. Udhëheqësi sllovak i ka cilësuar si “mosrespektuese” komentet e Kallas që paralajmëroi liderët evropianë të mos udhëtojnë në Moskë. Udhëheqësi separatist serb i Bosnjës Milorad Dodik ka thënë se do të marrë pjesë gjithashtu.
Në vendin e tij, Vuçiç është përballur me protesta masive kundër korrupsionit të udhëhequra nga studentët që kanë tronditur seriozisht sundimin e tij autokratik 13-vjeçar. Ato filluan menjëherë pas shembjes së strehës së stacionit hekurudhor më 1 nëntor në qytetin verior të Novi Sadit që vrau 16 njerëz. Ngjarja ka qenë e lidhur me marrëveshjet e turbullta me firmat kineze dhe kompani të tjera të ndërtimit që ndërtojnë në vendin ballkanik.
Gjithashtu të mërkurën, parlamenti serb miratoi një qeveri të re të mbushur me ministra anti-BE, duke përfshirë ministrin e Informacionit Boris Bratina, i cili është shfaqur së fundmi duke i vënë flakën një flamuri të BE-së dhe duke brohoritur “ne nuk duam BE, ne duam bashkim me Rusinë”. Qeveria e mëparshme u rrëzua për shkak të presionit e protestuesve. LAJME24