Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka dhënë një deklaratë zyrtare lidhur me ngjarjen e rëndë të ndodhur më 20 prill, ku një 15-vjeçar, V.P., u gjet i vetëvarur pranë banesës së tij në fshatin Valare.
Sipas njoftimit zyrtar, sapo ngjarja u raportua nga Komisariati i Policisë Gjirokastër, nën drejtimin e Prokurorisë u ngrit menjëherë një grup hetimor, ku morën pjesë prokurori i seksionit për të mitur dhe prokurori i gatshëm. Hetimet e para kanë përfshirë këqyrjen e vendit të ngjarjes, ekspertimin mjeko-ligjor, sekuestrimin dhe analizimin e telefonit, kompjuterëve dhe materialeve shkollore të të miturit, si dhe marrjen në pyetje të personave që kishin dijeni për rrethanat.
Nga të dhënat paraprake të mbledhura deri më tani, nuk ka asnjë provë që të sugjerojë se akti i rëndë i të miturit ka qenë i lidhur me ngacmime apo bullizëm nga bashkëmoshatarët.
Prokuroria ka theksuar se hetimet do të vijojnë me përparësi të lartë për të zbardhur plotësisht motivet dhe rrethanat e ngjarjes, si dhe për të verifikuar mënyrën e trajtimit të rastit nga institucionet përkatëse.