“Vend i mrekullueshëm për t’u vizituar”
Shqipëria këtë vit arriti të kumbojë falë interesit të shtuar të turistëve të huaj, por edhe vëmendjes që mediat ndërkombëtare dhanë përmes shkrimeve promovuese.
Ato që ofron Shqipëria nuk u lanë pa përmendur as në mediumet e Spanjës, vend ky i konsoliduar në fushën e turizmit. Këtë herë është e përditshmja ‘Por Conocer’ që i ka kushtuar një artikull vendeve më të mira të Shqipërisë për pushime.
Në shkrim përmenden jo vetëm bregdeti, por edhe peizazhet malore që vetë gazetari Juan Luis i cilëson si mahnitëse. 5 janë destinacionet që sugjerohen për pushuesit në artikull, Saranda, Berati, Shkodra, Ksamili dhe Ohri.
Saranda përshkruhet si vend i përsosur për pushime bregdetare, Ksamili si destinacioni më i famshëm i plazheve shqiptare, Berati sugjerohet për arkitekturën, Lugina e Shkodrës për adhuruesit e ecjes dhe turizmit rural, ndërsa liqeni i Ohrit një nga më të vjetrit dhe të thellët në Evropë si ideal për shëtitje apo sportet ujore.
Në blogun spanjoll dedikuar turizmit, shkruhet se ndërsa shumica e udhëtarëve shkojnë në destinacione si Greqi apo Kroaci, Shqipëria është një vend i mrekullueshëm për tu vizituar për pushime.