Numri i të vdekurve në Dernan e shkatërruar nga përmbytjet mund të arrijë në 20,000, sipas kryebashkiakut të qytetit lindor të Libisë që pësoi goditjen më të rëndë nga kalimi shkatërrues i stuhisë Daniel.
Abdnulmenam Al Ghaiti i tha televizionit al-Arabiya se këto vlerësime bazohen në numrin e banorëve në qytet që “u zhdukën” nga uji që përmbyti Derna natën e së dielës, pasi një lumë doli nga shtrati dhe dy diga u prishën.
Më shumë se 5,300 njerëz kanë vdekur që kur stuhia Daniel goditi Dernan dhe të paktën 10,000 janë të zhdukur. Të shpërngulurit arrijnë në dhjetëra mijëra, sipas BBC, e cila transmeton se dy qeveritë rivale të vendit tani janë dakord për t’u marrë me tragjedinë e paprecedentë.
“Të dyja qeveritë i bënë thirrje komunitetit ndërkombëtar për ndihmë,” i tha rrjetit britanik Tawhid Pasha nga Organizata Ndërkombëtare për Migracionin. “Qeveria e Unitetit Kombëtar [qeveria perëndimore] ka ofruar mbështetjen e saj dhe po koordinon veprimet e saj me qeverinë në lindje. Sfida tani është se si komuniteti ndërkombëtar do t’i përgjigjet nevojave dhe kërkesave të qeverive”, tha ai. Por zoti Pasha theksoi se vendi ka nevojë për më shumë ndihmë të menjëhershme, pasi kushtet janë urgjente.
WARNING: GRAPHIC CONTENT
— Reuters (@Reuters) September 14, 2023
Residents of the devastated Libyan city of Derna desperately searched for missing relatives after a catastrophic flood that killed thousands of people and swept many out to sea https://t.co/2HxpYO4XSv pic.twitter.com/YKHS8xYZtm
Autoritetet lokale dhe shërbimet e urgjencës në Libinë lindore dje i bënë thirrje komunitetit ndërkombëtar për ndihmë, duke paralajmëruar se vendi nuk ka infrastrukturën e nevojshme për t’u përballur me një fatkeqësi të kësaj shkalle. Kryebashkiaku i Derna tha se ekipet e shpëtimit nga Egjipti, Tunizia, Emiratet e Bashkuara Arabe, Turqia dhe Katari kanë mbërritur në zonë. “Në fakt, ne kemi nevojë për ekipe të specializuara në rikuperimin e trupit. Kam frikë se në qytet do të bjerë një epidemi, për shkak të numrit të madh të të vdekurve nën rrënoja dhe në ujë” , tha ai.
“Ne kemi nevojë për ndihmë,” tha Lutfi al-Mishrati, kreu i shpëtimtarëve, për televizionin Al Jazeera.
Shkatërrimi në Derna është i dukshëm nga lart, qendra e qytetit dikur me popullsi të dendur, e ndërtuar përgjatë një shtrati të thatë lumi, tani është kthyer në një hapësirë të gjerë dhe të sheshtë toke me baltë. Ndërtesat nuk janë më aty. Ndërtesat e larta u shembën dhe familje të tëra, që flinin brenda, nuk arritën të shpëtonin.
Asnjë agjenci nuk ka publikuar një numër përfundimtar, por të gjithë pajtohen se numri i të vdekurve është me mijëra.
Hissem Abu Skiwat, ministër i aviacionit civil në qeverinë lindore të Libisë, i tha Reuters se më shumë se 5,300 trupa ishin numëruar dhe ky numër mund të dyfishohet. “Deti po i kthen vazhdimisht kufomat”, tha ai.
Tarek Haraj, zëdhënës i asaj qeverie tha se 3200 të vdekur janë gjetur dhe 1100 prej tyre nuk janë identifikuar.
Presidenti i Egjiptit Abdel Fattah al-Sisi urdhëroi dje të ngriheshin kampe në kufirin perëndimor të vendit për të strehuar të mbijetuarit nga përmbytjet shkatërruese në Libinë fqinje. Sipas gazetës “Al Ahram”, Sisi ka kërkuar që të organizohen kampe në bregdet, në kufirin me Libinë, “për vëllezërit tanë libianë që humbën shtëpitë e tyre”.
Midis viktimave në Derna janë të paktën 145 egjiptianë, trupat e të cilëve u riatdhesuan të martën. Sisi shprehu ngushëllimet e tij për familjet e tyre dhe bëri thirrje për “ndihmë urgjente” për të afërmit e viktimave.
Organizimi i kampeve në Egjipt është i paprecedentë. Kajro kishte refuzuar shumë herë ngritjen e strukturave të tilla akomoduese në kuadrin e krizës së refugjatëve.