Ndërprerja masive e energjisë elektrike në pjesën më të madhe të Spanjës dhe Portugalisë këtë të hënë ka ndaluar trenat, ka ndërprerë shërbimin telefonik, janë mbyllur semaforët dhe bankomatët për miliona njerëz në të gjithë Gadishullin Iberik.
Shpërndarësi spanjoll i energjisë “Red Eléctrica” nuk pranoi të spekulonte mbi shkaqet, por shtoi se rikthimi i plotë i energjisë elektrike mund të zgjasë nga 6 deri në 10 orë. Kreu i operacionit, Eduardo Prieto, u tha gazetarëve se kjo ishte e pashembullt, duke e quajtur ngjarjen “të papritur dhe të jashtëzakonshme”.
Kryeministri i Spanjës, Pedro Sánchez, tha se një “goditje e fortë” në rrjetin elektrik evropian ishte shkaku i ndërprerjes, por arsyeja nuk është sqaruar ende. Ai i kërkoi publikut të përmbahet nga spekulimet dhe nxiti njerëzit të telefonojnë shërbimet e emergjencës vetëm nëse është vërtet e nevojshme.
Kjo është ndërprerja e dytë serioze e energjisë elektrike në Evropë në më pak se 6 javë pasi një zjarr në 20 mars mbylli Aeroportin Heathrow në Mbretërinë e Bashkuar. Ngjarja vjen teksa autoritetet në të gjithë Evropën përgatiten kundër sabotimeve të mbështetura nga Rusia. Qendra Kombëtare Portugeze e Sigurisë Kibernetike në një deklaratë tha se nuk kishte shenja që ndërprerja të ishte bërë për shkak të një sulmi kibernetik.
Teresa Ribera, nënkryetare ekzekutive e Komisionit Evropian përgjegjëse për promovimin e energjisë së pastër, u tha gazetarëve në Bruksel të njëjtën gjë. Ajo e quajti ndërprerjen e energjisë elektrike “një nga episodet më serioze të regjistruara në Evropë kohët e fundit”.
Ndërprerja filloi rreth mesditës. Zyrat u mbyllën dhe trafiku u bllokua në Madrid dhe Lisbonë, ndërsa disa civilë në Barcelonë nisën të drejtonin trafikun. Shërbimet hekurudhore në të dy vendet u ndalën. Nuk do të jetë e mundur të rifillojnë trenat këtë të hënë edhe nëse energjia elektrike do të kthehej njoftoi në mediat sociale Ministri i Transportit i Spanjës, Oscar Puente.
Sistemet e metrosë u mbyllën. “Nuk e di se si do të shkoj në shtëpi” – tha një banore e Barcelonës, Ivette Corona. Spitalet dhe shërbimet e tjera të urgjencës po punojnë me gjeneratorë. Karburantet ndaluan së punuari. Nuk ishte e mundur të bëheshin telefonata në disa rrjete celulare, megjithëse disa aplikacione funksiononin. Njerëzit nisën të kërkonin radio me bateri.
Është e rrallë të ketë një ndërprerje kaq masive në të gjithë Gadishullin Iberik, me një popullsi prej rreth 60 milionë banorësh. Ishujt Kanarie, Ishujt Balearik të Spanjës dhe territoret e Ceutës dhe Melillës, të vendosura përtej Mesdheut në Marok, nuk u prekën. Kryeministri i Spanjës thirri një mbledhje të jashtëzakonshëme të Këshillit të Sigurisë Kombëtare. Edhe qeveria portugeze thirri një takim urgjent në rezidencën e kryeministrit.
Kryeministri portugez Luís Montenegro tha se kishte folur disa herë me Sánchez dhe priste që energjia elektrike të rikthehej. Qeveria e Portugalisë tha se ndërprerja duket se rrjedh nga problemet jashtë vendit, tha një zyrtar për agjencinë kombëtare të lajmeve Lusa. Energjia elektrike po sillej përkohësisht nga Maroku dhe Franca për të furnizuar Spanjën. Spanja rriti gjithashtu prodhimin nga termocentralet hidroelektrike dhe termocentralet me cikël të kombinuar.
Aeroportet spanjolle po funksiononin me sisteme elektrike rezervë, por disa fluturime u vonuan, përfshirë Madridin dhe Barcelonën. Në Lisbonë, terminalet u mbyllën dhe turistët qëndruan jashtë duke pritur lajme rreth fluturimeve. Parlamenti spanjoll në Madrid u mbyll dhe ndeshjet në turneun e tenisit Madrid Open u pezulluan.
Disa përfituan nga mungesa e energjisë për të shijuar diellin në tarracat e restoranteve, parqe dhe plazhe. Rrugët e Barcelonës u mbushën me turma njerëzish që lëviznin para dyqaneve të errëta dhe shkëmbenin informacione.
“Jemi me fat. Disa njerëz u bllokuan në metro. Dhe ka një anë pozitive: Po flasim më shumë me njëri-tjetrin”, – tha Monste Cortés në Barcelonë. Ndërsa orët kalonin, rritej edhe shqetësimi i atyre që nuk mund të kontaktonin me të dashurit e tyre. “Nuk mund ta telefonoj as shefin tim sepse asgjë nuk funksionon”, – tha Helen Osorio, një shitëse në Barcelonë.
Në Terrassa, një qytet industrial 50 kilometra larg Barcelonës, dyqanet që shesin gjeneratorë nuk kishin më mall. Autoriteti Kombëtar i Portugalisë për Emergjenca dhe Mbrojtje Civile tha se sistemet rezervë të energjisë ishin në funksionim.
Në Portugali, një vend me rreth 10.6 milionë banorë, policia vendosi më shumë oficerë në detyrë për t’u përballur me kërkesat në rritje për ndihmë, duke përfshirë edhe ata që mbetën të bllokuar në ashensorë. Disa vagonë të metrosë së Lisbonës u evakuuan, thanë raportet. Gjykata ndaloi punën dhe bankomatet dhe sistemet e pagesave elektronike u prekën gjithashtu. LAJME24