Pas lumit të kritikave, FSHF i ka hequr komentet negative në Facebook dhe më pas i ka bllokuar duke bërë që askush të mos komentojë më…
Një skandal i vërtetë ka ndodhur me shitjen e biletave për ndeshjen Shqipëri-Çeki që do të luhet më 12 tetor në “Air Albania”. Kjo ndeshje është vendimtare për kombëtaren tonë, pasi në rast fitoreje thuajse e kemi siguruar kualifikimin për në “EURO 2024”.
Por për shkak të kësaj rëndësie, duket se është bërë dhe puçi me shitjen e biletave. Fillimisht ishin mediat që njoftuan se biletat dolën në shitje dhe FSHF e mbajti të fshehtë lajmin. Madje sipas burimeve, zyra e shtypit e FSHF ka dërguar ankesa te mediat që pse e nxorën lajmin para njoftimit zyrtar, njoftimi i cili doli në orën 20:00 të mbrëmjes me 2-3 orë vonesë.
Por përtej kësaj, që kur doli lajmi e deri më sot faqja e shitjes së biletave nuk punon. Ndryshe nga herët e tjera, kur biletat shiteshin edhe fizikisht, FSHF vendosi që ato të shiten vetëm online.
Faqja ka 24 orë e bllokuar dhe duhet të presësh në radhë që të arrish të futesh. Vetë gazetarët tanë kanë qendruar dje gjithë natën dhe pas pritjes dhe futjes në sistem, në fund nuk kishte asnjë biletë në shitje. Kjo gjë ka ndodhur me qindra të tjerë që kanë pritur me orë të tëra dhe në fund bileta nuk kishte, pa përmendur këtu çmimet e kripura që kanë kapur nivele të frikshme. 3 mijë lekë pas portave dhe 8 mijë lekë përballë tribunës.
Kjo është parë dhe te komentet në faqen e FSHF në Facebook, ku të gjithë komentojnë se nuk kanë arritur të gjejnë bileta. Pas lumit të kritikave, FSHF i ka hequr komentet negative dhe më pas i ka bllokuar duke bërë që askush të mos komentojë.
Skandali tjetër është se shumë bileta kanë nisur të shiten online në tregun e zi. Në rrjetet sociale dhe faqe të ndryshe qarkullojnë bileta me çmime dyfishe. Nga ana tjetër një numri të madh tifozësh që kanë arritur të blejnë mbrëmë bileta me çmimin e zyrtar, sot u ka ardhur e-mail nga sistemi i federatës se blerja është anuluar dhe lekët u janë kthyer mbrapsht, pa asnjë shpjegim shtesë.
Shitjet në tregun e zi
Ka shumë nga ata që akuzojnë FSHF se bileta janë dërguar te miqtë dhe njerëz të afërt. Ka shumë të tjerë që thonë se deputetë, ministra e drejtorë kanë përdorur lidhjet e tyre për të blerë të gjithë biletat për fisin dhe familjarët, në fund qytetarët e thjeshtë dhe sportdashësit do e shohin nga televizori.