Ministria e Jashtme e Gjermanisë iu përgjigj Sekretarit të Shtetit të SHBA-ve, Marco Rubio, pas kritikave të tij ndaj vendimit të Berlinit për të etiketuar partinë e ekstremit të djathtë, Alternativa për Gjermaninë (AfD), si një “grup të konfirmuar ekstremist të djathtë”.
Të enjten, Rubio postoi në X (ish-Twitter): “Gjermania sapo i dha agjencisë së saj të zbulimit kompetenca të reja për të survejuar opozitën. Kjo nuk është demokraci – është tirani e maskuar. Ekstremiste nuk është AfD-ja popullore – që doli e dyta në zgjedhjet e fundit – por politikat vdekjeprurëse të emigracionit me kufij të hapur, të ndjekura prej establishmentit që AfD-ja e kundërshton”. Ai shtoi: “Gjermania duhet të tërhiqet nga kjo rrugë.”
Pas deklaratave nga Rubio të premten, reagime ka pasur edhe nga zëvendëpresidenti amerikan, J.D Vance dhe miliarderi, Elon Musk. Vance shkroi në X se AfD është “partia më popullore” në Gjermani. Tani “burokratët po përpiqen ta shkatërrojnë”.;
Miliarderi amerikan i teknologjisë, Elon Musk, i cili gjithashtu punon për qeverinë e presidentit, Donald Trump e komentoi po ashtu vendimin. Në X ai shkroi se “ndalimi i AfD, partia më popullore në Gjermani, do të ishte një sulm ekstrem ndaj demokracisë”.
Në një përgjigje në X, Ministria e Jashtme Gjermane u kundërpërgjigj:
“Kjo është demokraci. Ky vendim është rezultat i një hetimi të pavarur dhe të plotë për të mbrojtur Kushtetutën dhe shtetin ligjor. Gjykatat e pavarura do të kenë fjalën e fundit. Kemi mësuar nga historia jonë se ekstremizmi i djathtë duhet ndalur.”
Kjo përgjigje erdhi pasi shërbimi i inteligjencës së brendshme gjermane, Zyra Federale për Mbrojtjen e Kushtetutës (BfV), e shpalli AfD-në një “forcë të konfirmuar ekstremiste të djathtë” të premten.
Sipas vlerësimit të fundit të Zyrës Federale për Mbrojtjen e Kushtetutës s’ka më dyshime se partia AfD është në tërësi ekstremiste e djathtë dhe jo vetëm në lande të caktuara, por në të gjithë Gjermaninë.
Deri tani AfD-ja klasifikohej në nivel federal si “e dyshuar për ekstremizëm të djathtë” dhe ishte nën mbikvqyrjen e Zyrës Federale për Mbrojtjen e Kushtetutës.
Sot (02.05.) Zyra Federale informoi publikun se e gjithë partia klasifikohet tani si një “përpjekje e provuar ekstremiste e djathtë”. Kjo do të thotë që Zyra Federale për Mbrojtjen e Kushtetutës ka vërtetuar se AfD në tërësi është ekstremiste e djathtë dhe drejtohet kundër rendit themelor të lirë dhe demokratik.
Baza për këtë vlerësim të ri është një koleksion i gjerë materialesh të përditësuara vazhdimisht nga Zyra Federale për Mbrojtjen e Kushtetutës. Sipas informacionit të mediave publike gjermane ARD dhe SWR, raporti i Zyrës Federale përfshin më shumë se 1,000 faqe dhe synon të provojë pse AfD është, sipas mendimit të hetuesve të Zyrës Federale për Mbrojtjen e Kushtetutës, antikushtetuese. Vendimtare për këtë konkluzion janë shkeljet e anëtarëve të kësaj partie ndaj sundimit të ligjit, parimeve të demokracisë dhe dinjitetit njerëzor.
AfD-ja mbahet prej Zyrës Federale për Mbrojtjen e Kushtetutës në vëzhgim që nga viti 2019, kur hetuesit e kësaj zyre nisën të mblidhnin dhe të vlerësonin deklaratat publike të funksionarëve të AfD-së.
Vendimi i tanishëm shënon një përshkallëzim nga etiketimi i mëparshëm i partisë si një kërcënim i dyshuar për rendin demokratik gjerman. Sipas BfV-së, qëndrimet ksenofobike të AfD-së, të bazuara në një kuptim etnik të identitetit gjerman, janë “të papajtueshme me rendin bazë demokratik të lirë” të përcaktuar në kushtetutë.
Agjencia shtoi se AfD “synon të përjashtojë grupe të caktuara të popullsisë nga pjesëmarrja e barabartë në shoqëri, t’ia nënshtrojë ato një trajtimi të pabarabartë antikushtetues dhe kështu t’u japë atyre një status juridik të nënvlerësuar”.
Gjithashtu sipas shërbimit të inteligjencës së brendshme gjermane :
“Kjo mënyrë përjashtuese e të kuptuarit të popullit është pikënisja dhe baza ideologjike për propagandën e vazhdueshme kundër individëve apo grupeve të caktuara, përmes së cilës ata përçmohen dhe njollosen në mënyrë të paarsyeshme, duke nxitur frikëra dhe refuzim iracional.”
Gjatë zgjedhjeve të përgjithshme në shkurt në Gjermani – të cilat u ndikuan ndjeshëm nga ndërhyrja e SHBA-ve, përfshirë mbështetjen publike nga figura si Elon Musk dhe JD Vance – AfD fitoi rreth 21% të votave, duke u renditur e dyta.
Rritja në popullaritet e kësaj partie ekstremiste vjen në kuadër të një vale më të gjerë të ekstremizmit të djathtë që po rritet në mbarë Evropën.
Ndërkohë, figura publike në SHBA kanë bërë deklarata apo gjeste që simpatizojnë nazizmin, pavarësisht një fushate të gjerë të administratës Trump kundër antisemitizmit – një lëvizje që është vënë në pikëpyetje nga universitete dhe senatorë hebrenj, të cilët e akuzojnë Trump-in për kufizim të lirisë së fjalës.
Musk, i cili u emërua “këshilltar special i qeverisë” nga administrata Trump, bëri përshëndetje të njëpasnjëshme fashiste gjatë një mitingu inaugurues të presidentit në fillim të këtij viti.
Muajin e kaluar, gjatë një dëgjese në Kongres që kishte për qëllim të analizonte censurën e supozuar të qeverisë nën Joe Biden, përfaqësuesi republikan Keith Self citoi Joseph Goebbels-in, ministrin e propagandës naziste: ‘Është e drejta absolute e shtetit të mbikëqyrë formimin e opinionit publik,’ dhe kjo mund të jetë ajo për të cilën po diskutojmë këtu,” tha ai.
Burimi The Guardian, përgatiti T Çela, Lapsi.al