Kandidatja e PD-së në listën e hapur për qarkun e Tiranës, Jorida Tabaku po ndjek procesin e numërimit të votave preferenciale në shkollën “Hoxha Tahsim” në kryeqytet. Aktualisht Tabaku ka mbetur jashtë parlamentin me renditjen e numrit të votave që ka siguruar deri më tani.
Në një lidhje për emisionin “Log” në News24, Tabaku shprehet se procesi zgjedhor i 11 majit ishte një ndër më të parregulltat që ka parë. Ajo tha se kjo ka qenë garë e pabarabartë si në përballjen me kundërshtatin dhe mënyrën e zhvillimit. Tabaku tha se të jesh grua në listë të hapur dhe të bësh fushatë në 5 bashki të qarkut është strapacuese.
“Falënderoj njerëzit e opozitës që po monitorojnë zgjedhjet, megjithëse PD po humb. Së dyti sa i takon votës së kandidatëve është i shpërndarë, pasi ky proces ka prodhuar një situatë të paparashikueshme, një tendencë vihet re por se parashikojmë dot.
Ka qenë një garë e pabarabartë, si në përballje me kundërshtarin dhe në mënyrën si është zhvilluar. Të jesh në listë të hapur, të jesh grua dhe të bësh fushatë në 5 bashki të qarkut Tiranë është strapacuese. Do të pres deri në fund të bëj komentet.
Këto zgjedhje tregojnë shumë dhe për faktin se Shqipëria edhe pse ka hapur negociatat nuk di të bëjë zgjedhje. Ka faktorë dhe të brendshëm, proceset më të parregullt që kam vënë re. Mesazhi që kam sot është për sakrificën e demokratëve, edhe pse pas 12 viteve në opozitë.”, tha Tabaku.