Kryeministri Edi Rama, gjatë një takimi me gratë dhe vajzat në qytetin e Vlorës ka komentuar lobim 6 milionë dollarë në SHBA nga Partia Demokratike. Ai u shpreh se Berisha i ka paguar këto para për të hequr “non gratën”. Sipas kryeministrit këto janë para të dyshimta ndaj ngriti pyetjen se ku u gjetën këto para.
“Unë besoj që të gjitha ju që jeni këtu sot ashtu si të gjithë të tjerët që e ndjekin këtë ballafaqim jeni sot të habitura nga fakti që janë paguar 6 milionë euro. Thuhet nga patriotët. Ju kujtohet se edhe herën e kaluar Luli për 500 mijë u bë leckë. Edhe ai tha u mblodhën disa patriotë.
6 milionë euro për të hequr damkën e një personi ‘non grata’ janë shumë për të mos bërë pyetjen se ku i gjetën gjithë ato para dhe si mundet që thjesht dhe vetëm për hallin e një njeriu të paguhen më shumë para se sa shteti i jep për të gjitha partitë politike të marra së bashku.
Është edhe pak e çuditshme se ne na thanë se sa të vinte Trump do të ikte “non grata”. Tani na u dashkan edhe 6 milionë euro me shprese se do të hiqet “non grata” dhe sikur të rri dhe sikur të iki kjo nuk është çështja e shumicës dërrmuese të shqiptarëve që janë sot në një moment historik”, – tha Rama.
LEXO EDHE: Kontrata 6 milionëshe/ Sa afër Trump ka mbërritur PD-ja?
Teksa i cilësoi këto zgjidhje si historike, Rama tha se shqiptarët janë mes zgjedhjes drejt Bashkimit Evropian dhe asaj siç e tha ai, “hallit personal të një 80 e kusur vjeçari”. Kreu i PS-së është duke vijuar agjendën e tij politike në çdo qark, duke takuar nga grupet e interesit deri te anëtarësia e Partisë Socialiste që është angazhuar në fushatën elektorale të 11 Majit. /LAJME24