Nga takimi në Kukës, kryeministri Rama u ka bërë thirrje qytetarëve të ndjekin sondazhet që transmetohen në televizione dhe që siç u shpreh ai, “nuk lënë gjë pa thënë për Partinë Socialiste”, por që në fund e nxjerrin fitues atë në zgjedhjet e 11 Majit.
“Siç e shihni nga të gjitha sondazhet që i publikojnë të gjitha llojet e televizioneve që nuk lënë gjë pa thënë kundër nesh, PS do t’i fitojë zgjedhjet e 11 Majit” u shpreh Rama duke shfrytëzuar në këtë mënyrë rezultatet paraprake që propagandohen në media për një fitore të sigurtë të Partisë Socialiste në 11 Maj.
Katër sondazhet/ Si përdoren shifrat për propagandën e 11 Majit
Megjithatë, edhe pse sondazhet e nxjerrin fitues, vetë Rama nuk duket aq i sigurtë në rezultatin e 11 Majit. Disa muaj para zgjedhjeve ai paralajmëroi një fitore të thellë si ajo e 1997 për PS, pastaj e uli numrin e deputetëve në 78, pastaj në 74 dhe së fundmi thotë se nuk ka mundësi që të marrë më pak se 71 deputetë.
Ajo që është e sigurtë, në këtë periudhë të fushatës është se sondazhet në vetvete janë shndërruar në një armë të rëndësishme elektorale, që Rama vetë po e përdor për propagandë.