Kryeministri Edi Rama iu përgjigjet ndjekësve në rubrikën “Sy m’sy”, duke bërë sërish thirrje bojkoti të zgjedhjeve për ata që nuk mbështesin PS.
Një ndjekës, i cili i kërkoi që të largohet me nder dhe t’i lërë vendin të rinjve Rama iu përgjigj kështu: “Këtë e vendos populli që nuk ka mendjen tënde. Është një gjykatës shumë i madh, suprem sovran. Dakord.” Kryeministri teksa ironizoi opozitën tha se “nuk është higjienike nga pikëpamja politike që të hidhesh në kënetë”.
“Edhe ty të bëj thirrje që të mos votosh, meqë e ke mendjen në kënetë dhe meqë nuk ke asnjë lloj tundimi se mbase voton për mua dhe për PS, mos voto fare. Mos u hidh në kënetë, sepse është diçka që nuk është higjienike nga pikëpamje politike. Këtë thirrje të bëj unë. Pastaj këto të tjerat ja lëmë kohësh”, tha kreu i qeverise.