Pas tre mandateve me koncesione miliardëshe, ligje për investitorë strategjikë dhe përjashtime nga taksat për hotelet me 5 yje, Edi Rama duket se më në fund ka kujtuar se qeveris nga e majta. Dhe për këtë, ka zgjedhur një premtim sa sentimental, aq edhe të pazakontë.
Nga Dimali, në një frymë përkujtuese të rolit të tij shtetëror, Rama premtoi se për nënat e papuna me tre apo më shumë fëmijë, shteti do të paguajë sigurimet shoqërore e shëndetësore. Jo për të kompensuar heqjen e ndihmës ekonomike për mbi 20 mijë familje, as për të balancuar privilegjet e dhëna për resortet e luksit, por sipas tij, që këto gra të mos mbeten pa pension.
“Për nënat pa punë dhe me 3 ose më shumë fëmijë kemi marrë një nismë që qeveria tu paguajë sigurimet shoqërore dhe shëndetësore, që pavarësisht se ato nuk janë në punë për faktin që kanë 3 ose më shumë fëmijë të mos mbeten pa pension” – u shpreh Rama, ndërsa shtoi:
“Janë 25 milionë euro çdo vit, që qeveria paguan për nënat e papuna” – tha ai, ndoshta për të treguar që nuk i harxhon të gjitha tek rrugët me pagesë apo në fasada. Një premtim që vjen tamam në kohë për të ndriçuar pak më shumë fushatën e katërt, të paktën në letër, në krahun e majtë. ©LAJME24