Detaje të reja janë zbardhur në lidhje me plagosjen e efektivit të “Shqiponjave” mbrëmjen e sotme në Tiranë.
Policia thotë se shërbimet e Forcës së Posaçme “Shqiponja” pasi kanë marrë informacion për një person që qarkullonte me armë zjarri, janë vënë në ndjekje të personit të dyshuar.
Por gjatë ndjekjes, ky person, ende i paidentifikuar ka qëlluar dy herë dhe ka plagosur efektivin Edlir Alleshi.
Ky i fundit është plagosur në bark dhe është në sallën e operacionit në spitalin e Traumës.
Ndërkohë autori dyshohet se është arratisur me makinë në drejtim të paditur.
Njoftimi i Policisë:
Tiranë/Informacion paraprak
Në lagjen “Kinostudio”, në rrugën “Hysen Xhura”, shërbimet e Forcës së Posaçme “Shqiponja” pasi kanë marrë informacion për një person që qarkullonte me armë zjarri, janë vënë në ndjekje të personit të dyshuar.
Gjatë ndjekjes, personi i armatosur ka hapur zjarr në drejtim të Forcave “Shqiponja”, dhe si pasojë është plagosur një prej efektivëve, inspektor E. A., i cili është dërguar menjëherë në spital për ndihmë mjekësore.
Në ndjekje të personit të armatosur janë venë shërbimet e tjera të Forcave “Shqiponja”, Patrullat e Përgjithshme, dhe Njësitë Speciale Operacionale, janë bllokuar hyrje-daljet e të gjitha rrugëve, dhe vijon kontrolli për kapjen e personit të armatosur.