Kukësi është ndër qarqet më të prekura nga shpopullimi në Shqipëri. Sipas Censit të fundit, popullsia është tkurrur me thuajse 30% duke zbritur në vetëm 61.998 banorë për tre bashkitë e qarkut Kukës, Has, Tropojë.
Nga viti 2014 deri në 2022 janë larguar mbi 16 mijë persona, ndërsa fshatrat boshatisen dhe të rinjtë largohen pa kthim, por ky realitet i zymtë nuk e ka penguar kryeministrin Rama të flasë për turizëm.
“Në Shqipërinë 2030, Kukësi do të arrijë në 1 milion turistë si qark. Zona të tjera e kanë arritur këtë shifër”, deklaroi ai, pa dhënë asnjë plan konkret për të ndalur largimin e njerëzve.
Premtimet për zhvillim nuk kanë munguar asnjëherë në qytetin më të varfër të vendit më të varfër të Europës, por gjendja mbetet e njëjta dhe fakti se kryeministri përsërit të njëjtin premtim, tregon se nga Kukësi nuk do të vazhdojnë të ikin vetëm të rinjtë, por edhe shpresa se diçka do të ndryshojë.