SPAK njoftoi ditën e sotme se ka nisur verifikimet pas publikimit të kontratës së PD me kompaninë amerikane ‘Continental Strategy”, e zotëruar nga njerëz të afërt të Trump, për të lobuar pranë qeverisë amerikane për një periudhë dy vjeçare.
Hetimi ka nisur kryesisht pas publikimit të kontratës në media.
Kontrata mban firmën e Sekretarit të Përgjithshëm të PD Flamur Noka, me garantor shqiptaro-amerikanin Nuredin Seci, në të cilën njoftohej se PD do t’i paguajë kompanisë amerikane 6 milionë dollarë për dy vite. PD ka parapaguar 750 mijë dollarë ndërsa pjesën tjetër do ta paguajë me 250 mijë dollarë në muaj për një periudhë dy vjeçare.
Partia Demokratike reagoi pas publikimit të kontratës.
Në deklaratën për shtyp të PD-së sqarohet se kontributi financiar për realizimin e këtij qellimi është marrë përsipër 100% nga patriotë shqiptarë që jetojnë dhe punojnë në SHBA si dhe demokratë të tjerë të larguar. Pagesa i është bërë kompanisë amerikane “Continental” që drejtohet nga Ambasadori Carlos Trujillo, i cili njihet gjithashtu dhe si avokat i Presidentit Trump.
Në deklaratë thuhet se komuniteti shqiptaro-amerikan përmes fondacionit “Make Albania Great Again” ka kontraktuar kompaninë “Continental” për të ndihmuar në konsolidimin e marrëdhënieve miqësore te Partise Demokratike si forca me e madhe opozitare me Kongresin dhe qeverinë e SHBA-së.