Një armëpushim 30-orësh që përfundoi pa filluar kurrë, me akuza të ndërsjella të shkëmbyera mes Moskës dhe Kievit. Kështu u mbyllën Pashkët e Ukrainës pas armëpushimit 30-orësh të shpallur nga Kremlini dhe që skadoi mesnatën e së dielës.
Ministria ruse e mbrojtjes konfirmoi rifillimin e luftimeve, duke shtuar se trupat e saj kishin “respektuar rreptësisht armëpushimin dhe qëndruan në linjat dhe pozicionet e pushtuara më parë”.
Megjithatë, presidenti ukrainas Volodymyr Zelensky flet për 1 882 raste të bombardimeve ruse, 812 prej të cilave përfshinin armë të rënda, kryesisht pranë qytetit të rrethuar të Pokrovsk. “Kjo Pashkë ka treguar qartë se burimi i vetëm i kësaj lufte dhe arsyeja pse ajo po zvarritet është Rusia”, – u shpreh lideri i Kievit.
Qëllimi i presidentit amerikan Donald Trump, i cili shpresonte se “Rusia dhe Ukraina do të arrijnë një marrëveshje këtë javë”, pasi kërcënoi se do të tërhiqej nga bisedimet e paqes në mungesë të përparimit të dukshëm, është që të dyja palët të pranojnë atë që u propozua në mars në Jeddah. Domethënë një armëpushim 30-ditor, të paktën kundër objektivave civilë. “Ne do ta vlerësojmë ofertën”, tha dje presidenti rus Vladimir Putin.
Kievi është nën presion: këtë javë ai duhet t’i përgjigjet planit të SHBA-së, i cili sipas parashikimeve të Wall Street Journal njeh aneksimin e Krimesë nga Moska në 2014 nga SHBA dhe përjashton Ukrainën nga NATO. Dy nyje që sigurisht nuk janë të lehta për t’u zgjidhur, veçanërisht e para sepse është në kundërshtim të qartë me politikën e jashtme 10-vjeçare të SHBA-së dhe me të drejtën ndërkombëtare.
Por jo vetëm kaq, Ukraina gjithashtu ka hedhur poshtë kufizimet për anëtarësimin në aleancat dhe organizatat ndërkombëtare, veçanërisht në NATO dhe BE, si kushte të një marrëveshjeje paqeje. Sekretari i Përgjithshëm i NATO-s Mark Rutte kohët e fundit e quajti rrugën e Kievit drejt anëtarësimit “të pakthyeshme”. LAJME24