Ditën e djeshme u mblodh në Romë Samiti i katërt ndërqeveritar midis Italisë dhe Turqisë, ku u nënshkruan 11 memorandume mirëkuptimi, si dhe një deklaratë e përbashkët. Palët nënvizuan rëndësinë e zhvillimit të marrëdhënieve midis BE-së dhe Turqisë, duke marrë parasysh statusin e kandidatit të Turqisë për anëtarësim. Në konferencën e përbashkët për shtyp me Georgia Meloni, Presidenti Rexhep Tayyip Erdoğan shprehu besimin e tij se Italia, e cila e ka mbështetur përpjekjen e vendit për anëtarësim në BE që nga fillimi, do të vazhdojë ta bëjë këtë.
“Samiti është mbledhur në një kohë zhvillimesh të rëndësishme në shkallë rajonale dhe globale, siç janë lufta Ukrainë-Rusi, debatet në zhvillim mbi arkitekturën e sigurisë evropiane, si dhe tregtinë ndërkombëtare, situata e rëndë në Gaza, sfidat e vazhdueshme si migrimi i parregullt dhe ndryshimet klimatike, duke bërë thirrje për një përgjigje koherente dhe bashkëpunim efektiv. Italia dhe Turqia, si aleatë të NATO-s dhe partnerë në G20, do të vazhdojnë bashkëpunimin dhe koordinimin e tyre të ngushtë në çështjet rajonale dhe ndërkombëtare”, thuhet në deklaratë.
Si dy vende partnerë strategjikë, Erdogan tha se lidhjet midis dy kombeve janë përmirësuar që nga samiti i tyre i parë ndërqeveritar në vitin 2008. Ankaraja do të vazhdojë të forcojë bashkëpunimin me Italinë, e cila ka bërë përparim të konsiderueshëm në industrinë e mbrojtjes, përmes partneriteteve dhe projekteve të reja. Me një bilanc të shkëmbimeve tregëtare prej 30 miliard dollarësh nga takimi i vitit 2022, gjatë samitit Ankaraja dhe Roma vendosën një objektiv të ri të vëllimit të tregtisë dypalëshe prej 40 miliardë dollarësh
“Në kontekstin e sigurisë së Evropës, u trajtuan zhvillimet e fundit në Ukrainë. U theksuaa mbështetja për integritetin territorial dhe sovranitetin e Ukrainës. Si një aktor kyç në sigurimin e sigurisë së Detit të Zi, Turqia do të vazhdojë të kontribuojë në përpjekjet që synojnë gjetjen e një zgjidhjeje,” thuhet më tej.
Duke vënë në dukje se të dy vendet japin kontribute të rëndësishme për paqen dhe stabilitetin global në Evropë dhe më gjerë, në deklaratë theksohet nevoja e rritjes së bashkëpunimit përmes konsultimeve të rregullta në të gjitha nivelet. Të dy vendet riafirmuan marrëveshjen e tyre për të mbajtur samitin ndërqeveritar rregullisht dhe për të thirrur samitin e pestë në Turqi.