Dorasi i njohur i krimit të organizuar, Nuredin Dumani, ka zbuluar sot në sallën e gjyqit (17 prill 2025) një tjetër kapitull nga rrëfimet e tij kriminale, duke renditur me emër dhe mbiemër disa prej figurave më të errëta të botës së nëndheshme shqiptare: Suel Çela, Behar Bajri dhe Elton Basha. Rrëfimi i tij, i gjatë dhe i detajuar, hodhi dritë mbi marrëveshje për vrasje me pagesë, biseda në rrjete të koduara si ‘Sky’ e ‘Matrix’, takime të fshehta dhe pagesa që arrijnë në shifra deri në 1.5 milionë euro.
Në dëshminë e tij, Dumani tha se fill pas përfshirjes në vrasjen e një personi të njohur si “Masha”, që mendohet se ishte drejtuesi i shkollës Willson në Tiranë, iu ofrua bashkëpunim nga Suel Çela:
“Pasi nisa të merrem me vrasjen e Mashës, vjen Baho më thotë Suel Çela kërkon të bëjë diçka me ne. Në momentin kur jam plagosur unë ka folur Henriku me Suel Çelën. Ia kam dhënë telefonin Henrikut të fliste me Suelin, kisha dy telefona që komunikoja me Suelin, ai e hoqi ‘Matrix’ pas vrasjes së Bled Muçës në Belgjikë.”
Ai tregoi gjithashtu për lidhjet me një emër të njohur nga Burreli:
“Elton Basha nga Burreli ka vite që e njoh. Më shumë se 15 vite më parë. Në telefon e kisha ‘bisha’. Për herë të fundit e kam takuar kur erdhi në Kosovë 2021, fundi i këtij viti. Ka nejt disa herë te unë në Kosovë. E takoja si shok, ça llogarie.”
Një tjetër sekuencë e rëndë e rrëfimit ishte ajo e negociatave me Behar Bajrin:
“Behar Bajrin, e kam takuar me Arlind Bushatin. I kishte thënë Elton Basha Arlindit se është shoku im. Tha bjere Nuredinin. Kto prisnin takim me mua, unë nuk shkova, çova Eltonin bashkë me Altinin, s’më kujtohet mbiemri, është nga Dibra. Isha në kontakt me Eltonin. Kërkojnë Nuredinin ato, i japin telefonin, ja ku është. Behar Bajri më tha pas një bisede me tensione dhe të gjatë, për të bërë goditje për atë, Dorian Dulin, Genc Tafilin, dhe persona të tjerë po s’më kujtohen. I kam kërkuar 1.5 milionë euro. Ai më dha 200 mijë euro se aq sa kërkova unë tha të çohen të vdekurit nga varri, si bëj dot. Unë i kërkova në këmbim Behar Bajrit, Talo Çelën. Sepse ma ofroi, të më ndihmonte tha kam rob. Ia kërkova thashë ma gjej ku është. Pas disa kohësh tha se di. Suel Çela ma ka pranuar vetë se ka bërë takim me Talo Çelën. Me Behar Bajrin kam komunikuar me ‘sky’ ose ‘matrix’.”
Dumani nuk kurseu as detajet nga dita e atentatit që ai vetë pësoi, teksa ishte nisur për të ekzekutuar një tjetër emër – të njohur si ‘Oti’:
“Dy kallashnikovë kisha, një do ia jepja Suel Çelës dhe një do e mbaja vetë për të goditur. Henrikut s’i tregova se ku jam. Ndalova fillimisht në Pajovë. Henriku s’më jepte info ku është Oti. Fola me Suelin e pyeta, se s’po dilte Oti, i çova vendin e makinës ku jam te kthesa e Cërrikut. Pashë disa makina, kam identifikuar 5 makina. Nuk e shoh mirë situatën i them Suelit, po largohem. 5 min më pas makina që më bëri atentatin mori për Cërrik. Më bllokuan rrugën makina me targa greke, njëri më bëri foto. U tërhoqa pas, nuk e vura re pas makinën tjetër që vinte. Një moment djathtas shoh që më gjuajnë me armë. Atë moment një ‘e clas’ vishnje pash. Ktheva instiktivisht, pash 3 veta, dy gjuanin e shoferi. I dhashë gaz makinës, kur gjujtën për së dyti më kapën plumbat. Ndalova makinën te një lokal, dhe kam zbritur në tokë. S’kam pas atë ditë info se ku ndodhej Talo Çela. Kam komunikuar vazhdimisht me Henrikun. S’kemi qenë për Talo Çelën por për Otin.”
Në këtë mozaik të rrëfimeve mafioze, Dumani vazhdon të prodhojë akuza dhe rrëfime për disa nga njerëzit më të njohur të krimit, duke u shndërruar në një nga njerëzit që po hedh dritë në atë që ndodh në botën e nëndheshme të krimit.