“Daily Mail” ka bërë një investigim se si përkthyes të Ministrisë së Brendshme Britanike janë përfshirë në një skemë fitimprurëse për të nxjerrë emigrantët e paligjshëm nga paraburgimi, kryesisht shqiptarë.
Ata kërkojnë 3 000 £ për të vepruar si dëshmitarë me qëllim gënjimin e gjykatës dhe për të siguruar lirimin me kusht të shqiptarëve të kapur duke hyrë në Mbretërinë e Bashkuar me pasaporta të falsifikuara me gomone apo me kamionë të vegjël. Garantuesit e rremë u premtojnë gjykatësve se emigrantët do të shkojnë në shtëpitë e tyre nëse lirohen.
Në realitet ata nuk kanë lidhje me të paraburgosurit në emër të të cilëve dëshmojnë dhe janë të lumtur që ata të jetojnë kudo. Për këtë arsye Mnistria e Brendshme Britanike ka nisur një hetim urgjent.
Në rrjetën e gazetarëve të “Daily Mail” ka rënë edhe një përkthyese shqiptare e quajtur Eglantina Legisi. Ajo është një përkthyese e pavarur që është e angazhuar në agjencitë e përkthimit që punojnë për Ministrinë e Brendshme, gjykatat, policinë dhe për një avokat të përfshirë në raste imigracioni.
Gazetarët e maskuar si emigrantë e kontaktuan atë në 3 mënyra të ndryshme dhe ajo doli garantë t’i ndihmonte. “Daily Mail” shkruan se vetë përkthyesja kishte shkuar ilegalisht në Mbretërinë e Bashkuar e kontrabanduar në pjesën e pasme të një kamioni pasi kishte përdorur një pasaportë të falsifikuar për t’u arratisur nga Shqipëria.
Ajo i tha gazetarit të maskuar të Daily Mail, i cili u paraqit si mik i një shqiptari në paraburgim pasi u kap duke hyrë ilegalisht në Mbretërinë e Bashkuar, se për 3000 £, plus 1000 £ për garantin, ajo mund të punësonte një përkthyes tjetër që punonte për Ministrinë e Brendshme për të dalë si garant.
Legisi e siguroi gazetarin që të mos “frikësohej” për zbulimin e mashtrimit, duke thënë se ajo dhe avokati do t’i informonin ata përpara seancës dëgjimore për lirimin me kusht dhe se do t’u bëheshin vetëm disa pyetje themelore në seancë. Për sa kohë që ai lirohej me kusht pa ndonjë masë shtrënguese, ai mund të jetonte kudo dhe të punonte “në të zezë”.
Ajo tha se avokati të cilit do t’ia referonte çështjen e dinte se ata do të përdornin një garantues të rremë. Gazetari i maskuar ngriti 3 herë shqetësimin se ai dhe garantuesi nuk kishin asnjë lidhje, por ajo e siguroi për gjithçka.
Daily Mail shkruan se kanë qenë 12 800 shqiptarë që kanë hyrë ilegalisht në Mbretërinë e Bashkuar duke shkelur rregullat e lirimit me kusht midis janarit 2022 dhe majit 2023. Pas publikimit të shkrimit, Legisi iu përgjigj “Daily Mail” duke mohuar se ajo personalisht kishte fituar para nga gjetja e garantuesve.
“Unë nuk kërkova para. Nuk e kam bërë kurrë për para. Thjesht i ndihmoj ata” – tha ajo. “Unë mohoj kategorikisht se kam sugjeruar ndonjëherë që përkthyesit e Ministrisë së Brendshme të pranojnë ryshfete prej 3000 £ për të manipuluar procedurat e imigracionit” – deklaroi ajo. LAJME24