Sali Berisha është shfaqur këtë të dielë në Breshia, në krah të emigrantëve shqiptarë që e kanë pritur mes flamujve kombëtarë e jehonës së himneve shqiptare dhe italiane. Por ajo që bie në sy është prania, në çdo hap, e Chris LaCivita – njeriut që menaxhon strategjinë elektorale të Partisë Demokratike shqiptare dhe që njëherazi ka qenë një ndër menaxhuesit e fushatës së Donald Trump për zgjedhjet presidenciale në SHBA.
Me një profil të fortë republikan, LaCivita duket se do të qëndrojë përkrah Berishës në këtë betejë politike ku ish-kryeministri i përjashtuar nga Kuvendi kërkon të kthehet si përfaqësues i “Shqipërisë Madhështore”. Prania e LaCivita në Itali është një sinjal që PD e Berishës kërkon të japë, me idenë që non grata është tejkaluar dhe opozita shqiptare është e lidhur me republikanët e SHBA.
Në fjalimet e tij gjatë ditëve të fundit në mitingjet e PD në Shqipëri, LaCivita ka bërë thirrje për të votuar kundër atij që e quan “regjimi i Edi Ramës”.Në mitingun hapës të fushatës elektorale të PD-së ka folur shkurt edhe drejtuesi i saj Chris LaCivita.
Kush është gati ta bëjë Shqipërinë madhështore sërish? Në vitin 2024, në Shtetet e Bashkuara, socialistët u përpoqën të fusnin në burg Donald Trump. Donald Trump nuk u dorëzua. Ata dështuan. Në vitin 2025, këtu në Shqipëri, socialistët duan të fusin në burg gjithë opozitën e tyre.
Edhe këtu do të dështojnë. Pse? Sepse nuk mund të mbrojnë dot bilancin e 12 viteve të fundit: 12 vite krim, 12 vite drogë, më shumë se 1 milion shqiptarë janë larguar nga vendi,
dhe 12 vite dështim ekonomik.
Pse të votoni për partinë që i krijoi të gjitha këto probleme? Votoni për Dr. Berishën. Jepini vendit tuaj mundësinë. Dhe jepini njerëzve shpresë. Faleminderit. Zoti ju bekoftë!” – tha ai.