11-vjeçari, nipi i pronarit të kompanisë “Pelikan Security” që ishte në automjetin ndaj të cilit u qëllua me breshëri plumbash mbrëmjen e së enjtes, vijon të jetë në gjendje të rënduar në spitalin e Traumës, pasi plumbat e kanë prekur në kraharor. I mituri tjetër, 17 vjeç, që nga mbrëmja e djeshme është transportuar për mjekim në një spital privat në Tiranë.
19-vjeçari Kian Mullahu është jashtë rrezikut për jetën. Në spitalin e Traumës është edhe 34-vjeçari Arecn Stafa, i cili po ashtu nuk ka probleme.
Ngjarja ka ndodhur rreth orës 21:50 të 17 prillit pranë Tregut Agro Ushqimor në Tiranë. Të katërt kanë qenë duke udhëtuar me një mjet luksoz tip “G Class” kur autorët i kanë qëlluar me armë zjarri.
Dinamika është ende e paqartë, por burime paraprake bëjnë me dije se ndaj tyre është qëlluar me armë në Unazë të Madhe teksa kanë qenë në lëvizje dhe mjeti drejtohej nga 34-vjeçari, shoqërues i familjes së pronarit të “Pelikani Security”.
Në përjekje për t’u larguar, nga dinamika që kanë ndërtuar deri më tani hetuesit, mësohet se 34-vjeçari ka udhëtuar me mjet deri në zonën e Lundrës dhe më pas për shkak të plagëve që ka marrë ka humbur ndjenjat. Në këtë moment kanë qenë persona të rastësishëm që i kanë ndimuar të plagosurit për t’i dërguar në spitalin e Traumës.
Autorët e ngjarjes janë ende të paidentifikuar, ndërsa mbetet e paqartë se kush ka qenë shënjestra e atentatit, por një grup hetimor është ngritur dhe po punon për zbardhjen e plotë të ngjarjes.
Forca të shumta policie dhe pika kontrolli janë ngritur për kapjen e autorëve, ndërsa policia do të vëzhgojnë edhe kamerat e sigurisë për të bërë të mundur zbardhjen e plotë të dinamikës së ngjarjes. Disa persona janë marrë në pyetje nga grupi hetimor, kryesisht dëshmitarë të vendit të ngjarjes, ndërsa në pyetje pritet të merren edhe familjarët e të plagosurve.