Në Konferencën Rajonale “Përshpejtimi i Reformave të Kujdesit për Fëmijët drejt Anëtarësimit në Bashkimin Evropian”, ambasadori i Bashkimit Evropian në Shqipëri, Silvio Gonzato, ngriti shqetësimin për largimin e trurit në vendet e Ballkanit Perëndimor, përfshirë Shqipërinë, dhe theksoi domosdoshmërinë për garantimin e të drejtave bazë për fëmijët.
Gonzato deklaroi se garantimi i aksesit në shëndetësi falas, arsim cilësor dhe përfshirja sociale janë thelbësore për një zhvillim të qëndrueshëm dhe për të frenuar fenomenin e emigrimit masiv të të rinjve.
“Çdo fëmijë të ketë mundësi për të drejta bazë si shëndeti dhe arsimi. Të gjithë fëmijët, veçanërisht ata që përjetojnë përjashtimin social për shkak të varfërisë apo formave të tjera të disavantazheve, duhet të kenë shanse të barabarta”, theksoi ai.
Diplomati evropian nënvizoi se ky është një nga aspektet më të rëndësishme të integrimit në Bashkimin Evropian, i cili nuk konsiston vetëm në miratimin e legjislacionit, por në një transformim të thellë të shoqërisë.
“Një nga pyetjet që duhet të bëjmë është: A po bëjmë aq sa duhet për të rinjtë? Kjo është e rëndësishme për rajonin, ku ka ende largim të trurit. Në nivel të BE ne do të donim që t’i përgjigjeshim kësaj thirrje. Këtë e bëmë me anë të shtyllës evropiane të të drejtave sociale”, tha Gonzato.
Duke folur për objektivat e BE-së në kuadër të Planit të Veprimit për një Evropë Sociale të Fortë, ambasadori shtoi:
“Një nga objektivat që duhet të arrihet deri në 2030 është ulja e numrit të personave që janë në rrezik varfërie apo nga përjashtimi social në të paktën 15 milionë dhe shifra për fëmijët është 5 milionë. Të paktën 15 milionë fëmijë nuk duhet të jenë më në varfëri. Ne e shikojmë garanci për fëmijët si një program kyç për të ofruar mbështetje të rinjve.”
Në këtë kuadër, ai theksoi kalimin nga angazhimet në letër, drejt veprimeve konkrete në terren:
“Ne duam të kalojmë nga fjalët tek veprat që fëmijët të kenë qasje në shëndetësi falas, qasje në arsim cilësor, të kenë strehim me dinjitet, por edhe për të pasur ushqime.”
Ambasadori gjithashtu theksoi rëndësinë e ndihmës për kalimin e të rinjve nga shkolla në punësim me dinjitet:
“Duhet dhënë kontribut për integrimin e tyre në punë, që tranzicionin nga shkolla në punë ta kalojnë mirë.”
Duke iu referuar negociatave për anëtarësim në BE, Gonzato tha se çështjet që lidhen me të drejtat e fëmijëve janë pjesë e thelbit të këtij procesi:
“Procesi i anëtarësimit nuk do të thotë vetëm miratim legjislacioni, por kërkon shndërrim të shoqërisë në të gjitha aspektet e saj. Sipas negociatave për anëtarësim, të drejtat e fëmijëve janë pjesë e grup kapitullit themelor, ndërsa legjislacioni për arsimin dhe politikën sociale mbulohet nga grup kapitullit tre, që shpresojmë të hapet së shpejti.”
Në fund, ai nënvizoi rolin e BE-së për të mbështetur reformat sociale në vendet aspirante për anëtarësim:
“Vendet kandidate pritet që të krijojnë kuadrin e duhur për të krijuar mjedisin që lejon ecjen përpara të rinisë, duke ofruar studentëve aftësitë që i duhen edhe nga tregu i punës. Të krijohen më shumë mundësi dhe më shumë mundësi të barabarta për punësim me dinjitet. BE është këtu për të shoqëruar vendet kandidate në rrugëtimin e tyre të reformave, përfshirë politikën sociale”, përfundoi ambasadori Gonzato.