Policia në Kukës ka shpallur në kërkim 2 persona, pasi akuzohen për korrupsion aktiv në zgjedhje. Ata dyshohet se morën vota për PSD-në. Strukturat hetimore të policisë në Kukës nën drejtimin e SPAK po punojnë për kapjen e dy kushërinjve Gazment Peposhi dhe Kalosh Peposhi. Policia sqaron në njoftim se është ushtruar kontroll në banesën e tyre. Po ashtu, SPAK dhe policia po punojnë për identifikimin e personave të tjerë ndaj të cilëve ka dyshime se janë dhënë lekë për blerje vote.
‘Policia e Kukësit ka shpallur në kërkim shtetasit Gazment Peposhi dhe Kalosh Peposhi, dhe vijon puna intensive për kapjen e tyre. Strukturat hetimore të DVP Kukës nën drejtimin e SPAK po punojnë intesivisht me qëllim identifikimin e shtetasve të tjerë ndaj të cilëve ka dyshime se janë dhënë vlera monetare për orientimin e votës së tyre ndaj një subjekti politik’, njoftoi sot policia.