Më shumë se tre mijë njerëz u mblodhën në Terni për t’i dhënë lamtumirën e fundit Ilaria Sulës, vajzës shqiptare të vrarë tragjikisht në një akt që ka tronditur opinionin publik italian dhe shqiptar. Mes dhimbjes dhe heshtjes së rëndë, familja e saj kërkoi drejtësi, duke folur qartë e prerë kundër faljes për autorin e krimit.
Në fund të ceremonisë mortore, babai i saj, Flamuri, u shpreh me emocion të thellë: “Ai duhet të kalbet në burg,” – tha ai, duke iu referuar kujtdo që ia mori jetën vajzës së tij.
“Ne i thamë lamtumirën për herë të fundit vajzës sime Ilaria, e cila tani është lart në parajsë. Ajo nuk e meritonte këtë fund sepse ishte me të vërtetë një fëmijë i artë, një engjëll,” – shtoi ai, duke falënderuar gjithashtu policinë për punën e tyre.
Në këtë moment, edhe vëllai i saj Leoni u shpreh shkurt, por me dhimbje të thellë: “Të gjithë njerëzit që erdhën, flasin të pikëlluar,” – tha ai.
Gjatë ceremonisë përpara hyrjes së varrezave, kryetari i bashkisë së Ternit, Stefano Bandecchi, mbajti një fjalim prekës, duke e përshkruar autorin e krimit si: “një djall në rrugën e saj, një njeri të padenjë për t’u quajtur burrë”.
Ai foli për dhimbjen e thellë që kishte përfshirë qytetin dhe zemrën e Ilarias: “Trishtim i madh në zemrën e saj dhe vetëdije se nuk duhej të ishte këtu në këtë gjendje.”
Kryetari falënderoi gjithashtu komunitetin shqiptar dhe mysliman në Terni: “Faleminderit për dinjitetin dhe forcën me të cilën keni përballuar këtë ngjarje kaq të vështirë dhe të papritur për qytetin tonë.”
Por në momentin kur Bandecchi përmendi mundësinë e faljes, një grua në turmë reagoi me zë të lartë: “Burgim të përjetshëm!” – një thirrje që u përshëndet menjëherë me duartrokitje të gjata nga të pranishmit.
Në mbyllje, babai i Ilarias theksoi edhe njëherë kërkesën e familjes për drejtësi reale: “Shpresojmë që drejtësia italiane të mos na japë fjalë të kota, si falje.”