Rruga e Arbrit është shfrytëzuar në maksimum nga Rama në çdo fushatë elektorale dhe jo vetëm. Por teksa qeveria Rama ndodhet në mandatin e tretë, nuk e di se kur mund të përfundojnë punimet për rrugën e Arbrit.
Reagimi i dy zyrtarëve të lartë zv.ministrja e Infrastrukturës dhe kreu i ARRSH-së në një seancë dëgjimore në Komisionin e Ligjeve, na bën pesimist për mënyrën se si po qeveriset vendi. Ata nuk e dinin se kur do të përfundonte tuneli i Murrizit, ndërsa iu shmangën përgjigjes për vazhdimësinë e kontratës koncesionare për rrugën e Arbrit. Zv.ministrja Enkelejda Muçaj dhe drejtori i Autoritetit Rrugor Shqiptar, Evis Berberi iu shmangën gjithashtu pyetjes se çfarë do të ndodhë më tej me kontratën koncesionare.
“Është duke mbaruar asfaltimi për të gjitha segmentet rrugore, me përjashtim të tunelit të Murrizit,” tha kreu i ARRSH, Evis Berberi ndërsa shtoi: “në momentin që do të shohim dritë në fund të tij, do t’u japim një datë të saktë se kur përfundon”, shprehet Berberi.
Gjithashtu sipas Berberit, mospërfundimi i punimeve lidhet me problemet gjeologjike. Kontrata e rrugës së Arbrit ishte parashikuar për t’u dorëzuar në prill 2022, por qeveria mori vendim për t’a shtyrë këtë kontratë me 17 muaj të tjerë, afat që përfundoi me 20 shtator të këtij viti.
Theksojmë se ndërtimi i kësaj rruge u ka kushtuar taksapaguesve shqiptarë rreth 40 miliardë lekë [330 milionë euro], kosto për të cilën zyrtarët e ministrisë këmbëngulën se nuk ndryshon pavarësisht shtyrjes së afatit kohor të dorëzimit të saj.