Kryetari i Partisë Demokratike, Sali Berisha, ka rikthyer akuzat ndaj zv.kryeministres dhe ministres së Infrastrukturës, Belinda Balluku, duke e akuzuar për vjedhje në lidhje me projektin e Unazës së Tiranës. Ai tha se Balluku ka ndarë 13 km të kësaj rruge në 14 kontrata, duke përdorur këtë si një mënyrë për të pasur mundësinë të vjedhë më shumë.
Berisha theksoi se Shqipëria nuk mund të bëjë hapa përpara drejt Bashkimit Evropian, nëse ka persona të tillë në pozita udhëheqëse, duke e lidhur këtë me korrupsionin dhe mungesën e drejtësisë.
Ai po ashtu përmendi rastin e tunelit të Llogarasë, ku, sipas tij, u vodhën 60 milionë euro, dhe përmendi se shpenzimet për ndërtimin e rrugëve në Shqipëri janë shumë më të larta se në vendet e tjera të Evropës.
“Më 11 maj ndahen dy epoka, dy kohëra. Ka qeverisur 12 vjet dhe nuk mbron dot një arritje, sepse çdo arritje e ka një vjedhje. U vodhën 60 mln euro në tunelin e Llogarasë. Sepse rruga që në Kroaci ndërtohet me 1.6 mln euro 27 metra e gjë, në Shqipëri, rruga e Arbrit 10 metra ndërtohet me 11 mln euro. Se unaza e Tiranës 13 km ndahet në 14 kontrata për të vjedhur 14 herë dhe ndërtohet me 17 mln euro kilometrin. Pra për të mbuluar të gjitha këto kalon dhe kërkon ta bëjë parodi fushatën elektorale.
Mendon se duke hedhur shashka të tilla të turpshme mendon se shqiptarët do ti mashtrojë. Nuk shkohet në Evropë me kriminele si Edi Rama, nuk shkohet në Evropë me kriminele si Taulant Balla, nuk shkohet në Evropë me hajdute si lubi Balluku. Në Evropë shkohet me vendosjen e shtetit ligjor, me vendosjen e bandave para ligjit. Nuk shkohet në Evropë me Safet Bajrin, nuk shkohet në Evropë me Vis Pojën apo me bandat e Elbasanit. Shkohet kur ti vendosësh para ligjit. Ja them këtu, javën e parë ata shpallen grupe terroriste”, tha Berisha.